Pengerami Gawai 2013

Enda berasai nyau udah ka semak tiga minggu kitai bansa dayak kelebih agi bansa iban udah ngintu pengerami gawai. Kati gaya pengerami gawai kita taun tu tadi? Rami gawai kita? Dini kini alai endur kita begawai taun tu tadi? Pelaba aku mayuh bala pulai ke rumah panjai nyambut gawai ngau bala kaban belayan ke lama udah enda enggau betemu. Lama enda pulai, sigi sesengit ati ka pulai ke rumah panjai. Sigi gaya pengidup kemaya hari tu, enti enda maya gawai tauka krismas, sigi jarang endar mensia ka pulai ke rumah panjai. Ukai ngai kini, kebatang ia, semua kitai nitihka periuk asi diri empu. Enti enda cuti panjai, sigi nadai jalai ulih pulai ke menua. Nya meh kebuah iya, enti maya cuti panjai baka cuti gawai enggau krismas, beterudus aja bala mensia pulai ngagai rumah panjai diri empu.

       Nyau ngenang gawai ke taun tu (2013), rindu amat ati aku pulai gawai sekali tu taja mayuh endar penanggul ke nuntung aku lebuh maya mulaika diri ari semenanjung empai lama. Perkara ti nyadi ba aku endang enda disadang sekali. Mimit nadai meh aku nemu nasit diri ditinggal ke bilun sarinya. Naka meh penusah dalam ati ngenang diri ditinggal bilun maya nya. Dia aku lalu mupuk tusah ati ngenang ke nasit diri engka enda ulih ngau gawai taun tu. Tang, puji Tuhan, nasit endar gak aku ulih pulai ke menua ngena bilun sebengkah agi, nya pen nasit tiket ti dijual sida agi murah. Enti tiket mar tadi, sigi ba Malaya ditu meh aku begawai taun tu.

        Lengka ke dulu penusah tadi, diatu aku deka bekungsi ngau bala pemacha semua senentang pengerami gawai empai lama. Keterubah ia, aku deka nusui ngagai kita semua pejalai ngagai rumah panjai aku. Ngambi ke kita semua nemu, aku tu asal ari Ulu Katibas, Song. Nyadi, rumah panjai ke alai aku selalu pulai lebuh maya gawai enggau krismas ianya ba Tuai Rumah Api, Nanga Terusa. Enti sebut rumah panjai No. 2 pala menua, pelaba aku jarang endar orang Song enda nemu. Nya alai, ngagai kita bala pemacha semua ti bisi ati ka nemuai ngagai rumah panjai aku tau meh betanya ngagai orang ba pasar Song.

       Pejalai ngena perau mudik Sungai Katibas ngagai rumah panjai aku enti ngena injin sangkut Yamaha 15 kira – kira 7 jam pengelama ia (nitih gaya ai maya nya gak). Pelaba aku, bisi “ngapu” ninga pengelama jam mudik nya. Enti dibanding ke enggau pejalai bas, nyau baka pengelama pejalai bas ari Sibu ke Miri nya meh pengelama iya. Enti mudik urung pukul 11 pagi, kira-kira urung pukul 6 lemai pia baru datai ba rumah panjai aku. Sehari – hari nya meh ngelaban panas duduk ba perau. Enti nasit enda tentu manah, kadang-kadang, kena ujan ba rantau jalai. Bedau agi ke ditipuk lenggang ai enti perau kelalu sarat. Ukai ka ngenakutka kita ke bisi ati ka nemuai ngagai rumah panjai kami din tang tu meh pekara ke bendar nyadi sepemanjai jalai mudik ngagai rumah panjai kami din. Sangka aku, pejalai ngagai rumah panjai siku-siku engka enda sebaka laban diatu mayuh rumah panjai udah datai jalai alun. Ketebal agi, enti rumah panjai sebelah nengeri, jarang endar meda orang pulai nengah jalai ai agi diatu laban ke udah bisi jalai alun nuju rumah panjai sida. Tang, enti baka rumah panjai aku din, nadai jalai pulai nengah jalai alun. Penyauh nyau nadai endur nyema. Indah jalai ari Song ke Kapit ke pandak gik nya enda alah gaga, anang agi jalai alun ngagai rumah panjai aku din. Nyema digaga ila pen, engka nyau udah nyadi minyak petroleum magang rebak kitai tu pelaba aku.

       Lengka ke dulu cerita pasal jalai alun nya. Makin dikenang, makin ngasuh pedis ati aja. Awak ke bala YB meh berunding pasal utai nya. Hari iya ngaga, gaga gak, hari iya enda ngaga, enda gak. Nadai entu pulai ke penanggul endar nya asaiku laban nyau udah teleba nengah jalai ai ngelamatu. Tang, taja pia, enti bisi jalai alun, enda gak ngumbai diri enggai nengah iya tang meh munyi ku aku tadi meh, enda alah anti tembu digaga. Semampai nganti belama meh kami ba menua Song tu.

       Pulai baru ngagai berita gawai tu tadi, aku berasai gaga amat ati laban aya aku ke lama endar enda begawai ba rumah panjai bisi pulai gawai empai lama. Sampal sida sebilik pulai gawai ke rumah panjai. Naka meh pengaga ati meda bala sepupu ulih mulaika diri enggau kami begawai ba rumah panjai taun tu. Ukai naka nya aja, aku mega berasai lantang bendar ati laban ulih begawai enggau apai indai serta bala madi diri empu. Lelengau amat asai ati ke sida iya sekumbang lama udah ‘betapa’ ngiga penemu ba menua orang. Nasit bendar gak bisi cuti dua kali dalam setahun (cuti gawai enggau krismas), ulih gak pulai mantup ke pengelengau ati ngagai sida iya.

       Pelaba aku, naka tu aja dulu meh cerita gawai aku ke sekali tu. Enti tulis panjai-panjai legi, engka nyau enggai gak kita macha iya. Ba baruh tu bisi sekeda gambar ke sempat diambi maya cuti gawai empai lama. Sama-sama meh meda. Enggau tu, mupuk dulu aku, ila betemu baru gak ba ‘entry’ ti deka datai. Selamat Gawai semua...:)

Madi indu aku benung ngebuk tekuyung maya kami nengkuyung ngagai Ngeranau Mit

Makai pagi @ sarapan pagi ba tanju

Pengawa kami semadi maya nengkuyung

Aku enggau sepupu tuai...3 tahun jarak umur (enti enda silap aku)

Gambar lebuh ke diasuh orang ngajat...

Makai berimbai enggau madi lelaki ke nangkan aku

Makai besai maya malam 31 hb Mei..(lelengau asai ati lebuh meda gambar tu)

"Charge" dulu sebedau diasuh ngajat ngicha ke nemu ngajat ko jaku tang enda meh ulih ngajat (engka empai cukup 'charge' kini)

Begambar dulu sebedau nengkuyung

poco-poco maya gawai

Asuh orang ngajat dulu sebedau meraka babi tang meh tubuh ke ngai nyadi bai ngajat laban lama udah enda ngajat

 * Semua gambar di atas nya diambi ari facebook Purple Daisy, Christie Tra enggau Bresia Sia.